|
Meänmaa
– rajaton kieli, kansa ja mieli Met
halvaama koota meänmaalaisia, joita oon pitkin mailmaa ja jokka
kerran puhuit yhtä ja sammaa kieltä ja joila olit yhtheiset
tavat ja oli yks kansa, jonka tsaarin priimu vuona 1809 jako
kahtia Tornionväylää, Muonionväylää ja Könkämäenoa pitkin.
Rajalinjaksi tuli väylänkurkku, jota oon sanottu kuninkhaan
mustaksi nauhaksi. Tästä tuli Venäjän ja Ruottin raja. Se
veethiin kysymättä kansalta ja huolimatta siittä, ette se
halkasi suvut ja kultturellisen ykseyen.
Meänmaalaiset, joista 95% puhu vanhaanaikhaasta suomea jaethiin
niin, ette 80% jäi Ruottin alamaiseksi ja 20% Venäjän.
Meänmaa oon kärsiny kaupunkilaistumisesta ja muuttoliikheistä
Ameriikhaan, Norjan Ruihaan, Etelä-Ruothiin ja muuale käsin
mailmaa.
Nyt meilä oon oma sympoolinen maa, Meänmaa, oma flaku, Meänmaan
flaku. Meänmaahan oon tullu ruottalaisia invantraria, Meänmaata
on ruottalaistettu ja suomalaistettu. Siksi Meänmaassa nykyhään
puhuthaan monta kieltä, vaikka meänkieli ja lapinkieli oon
alkuperäisiä.
Perustajitten aatos ja näky oon kaikkialla mailmassa elävien meänmaalaisten
yhistäminen ja itenttiteetin vahvistaminen. Kieli oon sielun
sormenjäljet. Met halvaama siksi tehhä työtä meänkielen hyväksi.
Perustajat lähtevä liikheele uuesta monikultturelli
yhtheiskunnasta, jota ei ennä kanna vanhaa aatos yhestä kielestä,
kulttuurista ja kansasta. Yhistys vahvistaa Meänmaan ja
Tornionlaakson ihmisten yhtheenkuuluvuutta.
Yhistys
Orkanisasuuni
Eturyhmä
Meänmaan Kulttuurin ottaa tehtäväksi totteuttaa niitä päämääriä
joista Meänmaan Tinkerit oon kokkouksessa 15. heinäkuuta, Meänmaan
flakun päivänä, tehny päätöksen.
Tinkerit oon avoimet kaikile. Sana oon vapa. Passin omistajilla
oon valta äänestää.
Yhistys oon paraplyyjärjestö ja kotipesäjärjestö, johonka
saattaa kuulua yksityisiä passin omistajia ja saumattuja jäseniä
eri puolila mailmaa. Firmat, vaikkapa kuntia myöten saattava olla
jäseniä, samoten muut järjestöt, jokka hyväksyvvä ja
kannattavva Meänmaan Tinkerit-järjestön päämäärää ja
tavottetta. Saumatut jäsenet saattaava olla kolektiivisä ja
irtisanominen tapahtuu kans kolektiivisesti, vaikka mikhään ei
sitä estä ette joku oon kolektiivinen jäsen ja samala kertaa
yksityinen.
Jäsenkortti/Passi
Passihakemus, joka samala oon jäsenkortti, häätyy tapahtua
kirjotuksela.
Jäsenkortti oon samala Meänmaan passi, jossa oon passinumero ja
jossa oon tietoa meistä. Se oon kirjotettu meänkielelä ja
engelskaksi. Passi saattaa olla VIP-kortti, jolla saapi rapattia
kaupoissa ja laitoksissa.
Passissa oon postiosote, telefooninumero, meiliosote ja muuta
tietoa yhistyksen kontturia varten. Saattaa vaikka sanoa, ette meänmaalainen,
oli se yhtä missä mailmala, oon vain telefooninumero, postiosote
ja meiliosote kotimaasta. Yhistyksen kontturi oon Meänmaan ja meänmaalaisten
konsulaatin vertanen.
Myösterialue
Yks tämän järjestön tärkein asia oon rajaväylien itänen ja
läntinen puoli, samala Meänmaan syänalue, johonka kuuluu 5
Ruottinpuolen ja 5 Suomenpuolen kuntaa. Met kuttuma myösterhiin tällä
alueela asuvia, täältä siirtynheitä ja niitten jälkeläisiä.
Aluetta saattas piiain parhaiten kuvata kaartala olevia
knuppineulan päitä, jokka samala näyttävä mistä jäsenet oon
poijessa.
Meilä ei saata olla ampasaatia niinku valtioila, mutta met
saatama hommata jäsenampasaatia ja jäsenkonsuliä.
Meän tehtävä oon auttaa jäsenampasaatia antamalla tietoja.
Päämäärä ja tausta
Meänmaalaiset muuala saattava nyt tämän kautta ottaa ossaa Meänmaan
kulttuurista.
Rajanveto ja täältä poijes siirtyimen oon kovasti ehyttänheet
Meänmaata. Met halvaama korjata tätä asiata. Ihmiset, jokka
siiryit täältä poijes, menetit maholisuuen kirjottaa sisäset
tuntheet, sen häätyy tehhä ruottalaisila ja ameriikalaisila
sanoila. Net sanat ei olheet kotosia.
Met freistaama soutaa kotirannale täältä siirtynheitten
kirjotettuja aatoksia ja säveliä, täyttää ja rapata meän väen
tunnelämää, joka olis säilyny eheämpännä, jos net olisit tänne
jäähneet.
Yhistys oon tulevaisuutheen hakeva ja kääntyny, se tullee
kyshyyn ja hakheen vastauksia näihin kysymykshiin: Mikäs meän
tulevaisuus oon ja mitäs tapahtuu jos met emmä freistaa
vaikuttaa meän väen tulevaisuutheen?
Yhistys freistaa yhistää ja haarautua niin, ette täälä
manttaalilla olevat, emikrantit ja niitten jälkeläiset tunteva
kotosaksi meän yhistyksen.
Kontaktit johtava aatosten ja tion vaihthoon ja tämä taas hyötyntää
kaikkia, jokka oon myötä ja vieläpä ulkopuolisia.
Yhistys määrittellee Meänmaan erikoisuuen Pohjoskalotilla
niin, ette met emmä huku suuhriiin ja uushiin määritlehmiin.
Met piämä yhtä ja samma flakua.
Yhistys julkasee verkkolhteä ja tekkee pleunan, jossa jäsenet
saattava keskustella. |
|
